പത്തൊമ്പത്

നന്മ...
ഒരു വണ്ടിയെ പോലും കയറി പോവാന്‍ സമ്മതിക്കാതെ മറ്റുള്ള വണ്ടിക്കാരുടെ പിതാമഹാന്മാരെ വരെ തെറി വിളിച്ച് ഡ്രൈവ് ചെയ്യുന്നവനോട് എനിക്ക് വെറുപ്പും വിദ്വേഷവും തോന്നി. മറ്റുള്ളവരെ ഒട്ടും മാനിക്കാത്ത അയാളുടെ പ്രവൃത്തി എന്നിലരിശമുണ്ടാക്കി. പക്ഷെ അധികനേരം അത് നീണ്ടു നിന്നില്ല. ആരും തന്നെ സ്ലോ ചെയ്തു കൊടുക്കാത്തതിനാല്‍ ‘യു ടേണ്‍‘ എടുക്കാനാവാതെ ബുദ്ധിമുട്ടിയിരുന്ന ഒരു വണ്ടിക്കാരന് വേണ്ടി ഇയാള്‍ വണ്ടിയുടേ സ്പീഡ് കുറച്ചു കൊടുത്തപ്പോള്‍ എനിക്കയാളോട് മതിപ്പ് തോന്നി.

പലപ്പോഴും അങ്ങിനെയുണ്ടാവാറുണ്ട്. ചിലയാളുകളില്‍ എത്ര മോശം സ്വഭാവമുണ്ടായിരുന്നാലും അവരില്‍ നിന്നുമുണ്ടാകുന്ന ചില നല്ല പ്രവൃത്തികള്‍ അവരോടുള്ള നമ്മുടെ സമീപനത്തില്‍ മാറ്റം വരുത്തിയേക്കും. എല്ലാവരിലും നന്മകള്‍ നിറഞ്ഞിരിക്കുന്നുവെങ്കിലും ചിലയാളുകളില്‍ അത് പ്രകടമാവാറില്ല. ഒരു പക്ഷെ, അത് സാഹചര്യത്തിന്‍റേയോ ജീവിക്കുന്ന ചുറ്റുപാടിന്‍റേയോ കൂട്ടുകെട്ടിന്‍റേയോ ഒക്കെയാവാം. അതുകൊണ്ടു തന്നെ ആരേയും, കണ്ണുമടച്ച് നിഷേധി എന്ന ലേബല്‍ ചാര്‍ത്താതെ അവരിലും എന്തെങ്കിലും നന്മ കാണും എന്ന് വിശ്വസിക്കാന്‍ ശ്രമിക്കണമെന്ന് ഞാനാഗ്രഹിക്കാറുണ്ട്. പക്ഷെ, പലപ്പോഴും അത് എഴുതുന്നത് പോലെ പ്രവൃത്തിയില്‍ വരാറില്ലെന്നതാണ് സത്യം. അല്ലെങ്കിലും എഴുതാനും ഉപദേശിക്കാനും എളുപ്പമാണല്ലോ!

പുതിയ പേരുകള്‍...
‘മുസ്തഫ, മുസ്തഫക്ക...‘ എനിക്ക് കൂടുതല്‍ കേട്ടു പരിചയമുള്ളത് ഈ വിളികളാണ്. കോയമ്പത്തൂര്‍ സ്വദേശികളായ പളനിയും രമേഷും മത്രം സ്വന്തമാക്കി വെച്ച ഒരു വിളിയുണ്ട്... ‘മുസ്തഫേട്ടാ’. ബ്ലോഗിലെത്തിയതിന് ശേഷം കൂടുതല്‍ കേള്‍ക്കുന്നത് ‘അഗ്രൂ, അഗ്രജേട്ടന്‍, അഗ്രജനിക്ക...‘ പിന്നെ ആജു വിളിക്കുന്ന ‘അഗ്രജമാമ‘ എന്നീ വിളികളാണ്.

കഴിഞ്ഞ ദിവസം അപ്പപ്പോള്‍ ചുട്ടെടുക്കുന്ന ചൂടുള്ള ദോശ തിന്നുന്ന തിരക്കിലാണ് ഞാന്‍... അഗ്രജ ചുടുന്ന തിരക്കിലും. എന്‍റെ പോളിംഗ് സ്പീഡിനൊത്ത് പാത്രത്തില്‍ ദോശ വീഴാതിരുന്നപ്പോള്‍ ഞാന്‍ ധൃതി വെച്ചു... ഉടനെ അഗ്രജ പ്രതികരിച്ചു... ‘ഒന്നടങ്ങെന്‍റെ അഗ്രൂ...’. ആ അഗ്രൂ വിളി കേട്ട് എന്നിലെ മുസ്തഫ അന്തം വിട്ടു.

ഞാനിപ്പോള്‍ ‘മിസ്റ്റര്‍. അഗ്രജന്‍‘ എന്ന ബോസ്സേട്ടന്‍റെ വിളിയും ‘അഗ്രജനുപ്പാ’ എന്ന പാച്ചുവിന്‍റെ വിളിയും എപ്പ വരും എന്ന് കാതോര്‍ത്തിരിക്കുന്നു.

അശരീരീ...
കലക്കവെള്ളം എത്ര തെളിഞ്ഞാലും ഊറിയ ചളി അടിയില്‍ തന്നെ കാണും.

പാച്ചുവിന്‍റെ ലോകം...
‘എത്ര നാളായുമ്മാ...’പാച്ചുവിന്‍റെ സീരിയസ്സായുള്ള ചോദ്യം കേട്ട് നല്ലപാതി ചോദിച്ചു...
‘എന്തു പറ്റി മോളേ...’
‘കടലു കണ്ടിട്ടെത്ര നാളായി...’ പാച്ചു തുടര്‍ന്നു.
ആ പാട്ട് പാച്ചുവിനത്രയ്ക്കങ്ങട്ട് ഇഷ്ടപ്പെട്ടു പോയിരിക്കുന്നു.